Германија нема планови да ја признае палестинска држава на краток рок и изјави дека нејзин приоритет сега е да се постигне „долгоочекуваниот напредок“, изјави денес портпаролот на владата, еден ден откако францускиот претседател Емануел Макрон објави дека ќе признае палестинска држава во септември за време на Генералното собрание на ОН.

„Безбедноста на Израел е од најголема важност за германската влада“, рече портпаролот. „Затоа, германската влада не планира да признае палестинска држава на краток рок“, додаде тој.

„Признавањето на палестинска држава би дошло само како еден од последните чекори од решението за две држави“, рече портпаролот.

Палестинците долго време се обидуваат да воспостават независна држава на окупираниот Западен Брег, Газа и Источен Ерусалим преку посреднички мировен процес.

Многумина го обвинуваат Израел за уништување на перспективите за воспоставување палестинска држава преку зголемена изградба на населби на Западниот Брег и уништување на поголемиот дел од Газа за време на тековната војна.

Израел го негира тоа.

Во своето соопштение, германската влада повикува на прекин на огнот во Газа, ослободување на израелските заложници и разоружување на Хамас.

Исто така, се повикува Израел „веднаш да ја подобри (…) катастрофалната хуманитарна ситуација во Газа“.

Берлин инсистира на потребата од „одржлива политичка перспектива за Газа, така што привременото примирје може да доведе до траен мир“.

И конечно, германската влада го предупредува Израел дека „не смее да презема никакви нови мерки за анексија на Западниот Брег“.