Газда Деко бара да го пуштат во куќен притвор – дошол на судење со отворена рана
Одбраната на газдата на кабарето „Пулс“, Дејан Јованов – Деко кој е првообвинет за кочанската трагедија, бара судот да го пушти од затворскиот притвор и да му одреди мерка куќен притвор со образложение дека неговата здравствена состојба била аларамантно влошена.
Препорачано
Адвокатката на Деко, Ивана Коцевска кажа дека судот е запознаен со здравствената состојба на обвинетиот и потенцираше дека тој денеска со отворена рана по оперативен зафат е спроведен од болнички услови на судење.
– Импровизирано третирање во затворски услови гарантира катастрофални последици поради несоодветните услови, особено кога неговото здравје континуирано се влошува. Ова ги премина сите човечки граници на хуман третман и сметам дека е неопходно да му се укине притворот и замени со куќен. Селективна примена на оваа мерка, само на двајца од вкупно 34 кои се товарат за исто дело, иако Дејан е со најлоша здравствена состојба. Мерката притвор не соодветствува со целта, ова не е мерка за обезбедување присуство, туку казна пред судење – изјави Коцевска.
Судијката Дијана Груевска Илиевски, рече дека судот е многу добро запознаен со здравствената состојба и поради итност на негова согласност е однесен на операција во петокот.
– Таму сите лекари рекоа дека се потребни три дена мирување. Тие се поминати и затоа е денеска спроведен. Немаме такви сознанија од затворскиот лекар, а ние постапуваме по тоа – изјави Груевска Илиевски.
Јавното обвинителство рече дека ги сослушале наводите и по разгледување на документацијата на крајот од денешната расправа ќе одлучат дали ќе се произнесат или тоа ќе го направат писмено.
И претходно, неговата адвокатка бараше Деко да биде преместен од затворот во Куманово, каде што е во притвор, во затворот во Шутка бидејќи бил изложен на нечовечко однесување, но судот не го прифати ова барање.
Кумановскиот затвор ги демантираше тврдењата на Деко, и тврдеше дека на 26 февруари 2026 година бил извршен разговор со притворениот, кој потврдил дека нема проблеми со службениците. Единствените забелешки на газда Деко се однесувале на чести претреси и на фактот што побарал да му се смени душекот.
