Претседателот на Собранието, Африм Гаши, кој престојува во работна посета на Вашингтон, денеска се обрати на Форумот за безбедност во Вашингтон, на тема „Инвестирање од 5% во одбраната и посветеноста кон партнерството со САД“. На настанот учествуваа светски лидери и претставници на Американскиот конгрес, а фокусот на дискусиите беше ставен на глобалната безбедност и зајакнувањето на трансатлантската соработка, соопшти кабинетот на Гаши.

Во своето обраќање, Гаши рекол дека посветеноста на Република Северна Македонија кон НАТО е силна и доследна, нагласувајќи дека ниту една држава не може самостојно да ја гарантира својата безбедност. Земјата активно придонесува во Алијансата, ги исполнува преземените обврски и го докажува партнерството преку конкретни дела, вели собранискиот спикер.

„Во време на глобална неизвесност, соработката во рамките на НАТО е поважна од кога било, особено за земји како нашата, во срцето на Балканот. Зајакнувањето на институциите, инвестициите во одбраната и заедничката интероперабилност се од суштинско значење за нашата колективна отпорност“, рекол Гаши.

Тој додал дека „Северна Македонија стои како лојален сојузник на НАТО и стабилен партнер на Соединетите Американски Држави“, потсетувајќи на пораки за единство и заеднички вредности искажани од поранешните американски претседатели Џон Кенеди и Џорџ В. Буш.

„Северна Македонија ја избира одговорноста наместо двоумењето и единството наместо поделбите. Ова е нашето ветување кон заедничките вредности, заедничката безбедност и силната трансатлантска алијанса“, порача претседателот на Собранието.

Гаши го завршил обраќањето со порака на благодарност и со потврда за континуираната посветеност на земјата кон НАТО и партнерството со САД, информираат од неговиот кабинет.

Катар ќе поддржува надежни режисери наши, јави од арапската земја спикерот Африм Гаши