Во Националната галерија – објект „Мала станица“, од 12 ноември е отворена изложбата на дела создадени во рамки на 35. и 36. издание на меѓународната ликовна колонија „Галичник“.

Биеналниот проект е насловен „Колективна културна меморија: Постмеморија“ и е кураторски концепт на д-р Ана Франговска, претседателка на колонијата. Соработник на биеналната изложба со елабориран есеј е д-р Натали Рајчиновска Павлеска.

Колонијата „Галичник“, со речиси четиридецениска традиција, претставува уникатен модел што ги поврзува современата уметност, традицијата и локалното наследство. Преку темите „Колективна култура на сеќавање“ и „Постмеморија – Ехо на тишината“, уметниците од Македонија и од странство истражуваат како личните и колективните мемории, трауми и премолчани приказни продолжуваат да живеат низ уметничките практики.

На изложбата се претставени дела од над дваесет уметници од Македонија, Австрија, Бугарија, Грција, Полска, Кипар, Србија, Косово, Холандија, Словенија и САД, реализирани во различни медиуми – слика, видео, објект, фотографија, текст и инсталација.

Со овој проект, колонијата „Галичник“ уште еднаш ја потврдува својата улога како лабораторија на културна меморија, критичко мислење и меѓународна соработка, создавајќи дијалог меѓу минатото и сегашноста, тишината и гласот, личното и колективното.

Посебна благодарност организаторите на колонијата упатуваат до Министерството за култура и туризам на РС Македонија, без чија континуирана доверба и поддршка не би бил можен повеќедеценискиот континуитет и опстојување на овој проект.

(Текстот е објавен во „Културен печат“ број 307, во печатеното издание на весникот „Слободен печат“ на 15-16.11.2025)