Галеријата „Грал“ извести за лансирањето на својот нов официјален веб-сајт – современа дигитална платформа креирана со цел да ѝ понуди на публиката полесен пристап до уметноста, подлабоко разбирање на уметничките дела и поблиска комуникација со галеријата и уметниците.

Новиот веб-сајт (https://gral.com.mk/) е резултат на процес на јакнење на дигиталните и комуникациските капацитети на галеријата „Грал“, реализиран во рамки на проектот „Поддршка за обука на работното место и градење на капацитетите на организациите и професионалците во областа на културата и уметноста“.

Проектот е поддржан преку програмата „Култура за развој“ на Владата на Швајцарија, а се имплементира од „Хартефакт Фонд“. Активностите се спроведуваа во периодот од 17 ноември до 16 декември 2025 година во Скопје.

Во фокусот на дигиталната трансформација беше токму публиката – нејзините навики, интереси и потреби. Преку ангажман на ИТ експерт и креатор на содржини, галеријата „Грал“ го модернизираше начинот на презентација на уметничките дела, воведе автоматизиран дигитален инвентар и разви функционална е-трговија базирана на едукативен „storytelling“, овозможувајќи им на посетителите да ја доживеат уметноста и надвор од физичкиот галериски простор.

Новиот веб-сајт им овозможува на посетителите подобро да се информираат, да ги следат програмите и уметниците на галеријата, како и директно да комуницираат и да поддржат современа уметност.

Оваа дигитална платформа е посветена на публиката на галеријата „Грал“, создавајќи отворен, достапен и динамичен простор за дијалог, учење и уживање во уметноста.