Во Националната и универзитетска библиотека „Св. Климент Охридски” – Скопје денес свечено беше отворена Мултимедијалната читалница и промовирана едицијата на фототипни изданија „НУБ за македонскиот јазик“.

Како датум за одржување на овој настан е одбран денот кога е роден Крсте Петков Мисирков, една од најзначајните историски фигури за македонскиот јазик, бидејќи годинава се одбележуваат 80 години од кодификацијата на македонскиот стандарден јазик.

На настанот поздравни обраќања имаа министерот за култура и туризам Зоран Љутков и директорот Јовица Никчевски.

Во вториот дел на настанот, се обрати програмскиот директор Јовица Тасевски-Етернијан, кој го претстави проектот за издавање на фототипни изданија на значајни публикации од фондот на НУБ „Св. Климент Охридски“ поврзани со македонскиот јазик, а од името на авторките на предговорите во публикациите се обрати и истовремено ги промовира изданијата д-р Симона Груевска-Маџоска, претседателка на Советот за македонски јазик.