Футсал репрезентацијата на Македонија обезбеди пласман во главната рунда од квалификациите за Светското првенство 2028, откако со максимален учинок го заврши претквалификацискиот турнир во Литванија.

Нашите футсал репрезентативци остварија три победи во три натпревари, потврдувајќи ја фаворитската улога и квалитетот на турнирот.

Во последното коло, Македонија ја совлада селекцијата на Литванија со минимални 1:0. Стрелец на победничкиот погодок беше Јанев, кој погоди во 14 минута од средбата.

Претходно, Македонија забележа убедлива победа над Турција со 6:3, како и триумф од 4:2 против Бугарија, со што го заокружи настапот со девет освоени бодови.

На конечната табела во групата Ц, Македонија го освои првото место со девет бодови, пред Литванија и Турција со по четири, а Бугарија го освои четвртото место без ниту еден бод.