Кредитите со државни гаранции доделени од банките во Франција на компаниите за време на корона кризата, би можеле да донесат загуби и до шест проценти од вкупната вредност, процени гувернерот на Централната банка Франсоа Вилерој де Галхау.

Од почетокот на пандемијата на Ковид-19 во 2020 година, банките им одобриле на компаниите повеќе од 130 милијарди евра кредити со државни гаранции, што е најмногу во Европа.

Задолженоста на компаниите достигна рекордно ниво, иако од Централната банка посочуваат дека многумина од нив земале кредити поради превенција и дури не ги потрошиле позајмените пари.

– Што се однесува до нашата сегашна проценка (на загубите), ќе го наведам опсегот од 4,5 до шест проценти од вкупните заеми со државни гаранции кои можат да донесат загуби, истакна денеска гувернерот на Централната банка пред членовите на Комитетот за финансии на Сенатот.

Тој објасни дека „државата ќе сноси 90 проценти од загубите, а банките 10 отсто”.

Драстичниот пораст на долгот на француските компании ги загрижи деловните лидери, Министерството за финансии и Централната банка, кои стравуваат дека француските компании ќе излезат од кризата со сериозно оптоварени биланси, и нема да можат да инвестираат во раст. Министерството за финансии и Централната банка проценуваат дека на компаниите по завршувањето на кризата ќе им бидат потребни околу 20 милијарди евра свеж капитал.

Извор.МИА