Франција ги удвојува средствата за одбрана
Франција веќе почнала повторно да ги зголемува своите воени инвестиции и двојно ги зголемила средствата за одбрана во два закони за воени програми, изјави министерот за Европа и надворешни работи Стефан Сежурне.
На прашањето дали го споделува стравот на одредени воени функционери дека Русија може да ги нападне земјите на НАТО во рок од неколку години и дали западните земји треба да инвестираат повеќе во нивната одбрана, Сежурне во интервју за порталот „Вест Франс“ одговори дека, ако темата е егзистенцијална за Европската Унија, тоа значи дека од неа зависи нејзината колективна безбедност, јави МИА.
– Во сегашниот геополитички контекст, во наш интерес е да си ги поставиме вистинските прашања – рече Сежурне.
Тој смета дека на Европската Унија ѝ се потребни воени буџети кои ќе ѝ овозможат да се соочи со заканата и дека европската одбрана треба да се организира на покоординиран начин.
– Мораме да ги зголемиме нашите напори. Темата е егзистенцијална и ние како Европејци мора да најдеме безбедносни гаранции – посочи Сежурне.
Според него, ЕУ мора да се согласи дополнително да ја здружи својата воена опрема, да создаде интеракции меѓу армиите и постепено да има поголема воена интеграција за индустриски и оперативни прашања.
– Ова е очигледно дел од нашата агенда за европски суверенитет – рече францускиот министер.