Денеска во својот последен натпревар оваа сезона во Првата македонска лига, фудбалерите на Вардар и нови шампиони на Арената „Тодор Проески“ во Скопје со 3:0 славеа против Шкендија.

После завршувањето на првото полувреме на нашиот најголем стадион скопските „црвено-црни“ водеа со резултат 2:0.

Во 20 минута Вардар дојде во водство по автоголот кој беше дело на Нуман Ајетовиќ.

Предноста се зголеми во 36 минута од средбата кога стрелаше Закариќ за негов 11 погодок во шампионатот.

Конечниот епилог го постави македонскиот репрезентативец Бобан Николов во 80 минута од натпреварот.

Шкендија можеше да постигне почесен погодок од пенал преку Љатифи, но играчот на тетовскиот клуб не излезе како победник во дуелот со Талески.

За Гоце Седлоски ова беше последен меч на клупата како стратег на фудбалскиот клуб Вардар.

На конечната табела Вардар го освои првото место со 83 бодови, додека Шкендија заврши како второпласирана со 74 бодови.

Ова е 12 титула во колекцијата на Вардар со што ќе се зацврсти на првото место на вечната листа на најтрофејни екипи во Македонија.