Една од најголемите музички легенди на Балканот, светски познатиот Горан Бреговиќ синоќа во спортскиот центар „Јане Сандански“ одржа голем славенички концерт, одбележувајќи 50 години од основањето на „Бијело дугме“, само еден ден по неговиот 74 роденден.

Вечерта ја отворија нашите рок легенди „Леб и сол“, кои пак се потсетија на нивниот концерт од пред 47 години, кога првпат свиреле како предгрупа на „Бијело дугме“. Бодан Арсовски, Кокан Димушевски, Димитар Мичо Божиков и Михаил Парушев, очекувано за музичари од нивен ранг, звучеа беспрекорно, оправдувајќи ја титулата на едни од најдобрите на овие простори.

Веднаш по добро познатите хитови на „Леб и сол“ на сцената се појави Бреговиќ заедно со музичарите од неговиот “Оркестар за свадби и погреби” и приреди енергична атмосфера, карактеристична за неговите настапи.

Посетителите уживаа во музиката која спојува различни култури и на карактеристичен начин ги прикажува звуците на нашето поднебје, каде што се спојуваат истокот и западот.