Кај спомен-клупата на Горан Стефановски во Дебар Маало, во организација на Општина Центар, попладнево беше одбележан неговиот роденден со богата културна програма.

Настанот го отвори градоначалникот на Општина Центар, Горан Герасимовски, кој порача дека Стефановски останува траен дел од македонската културна меморија.

„Горан е тука – во зборот, во мислата, во сцената што никогаш не згаснува“, истакна Герасимовски.

Синот на Горан Стефановски, Игор, потенцираше дека му е посебна чест што од година во година се организираат вакви убави настани.

„Тато, нека ти е среќен денот на раѓањето. 74 години. Мислам дека кога некој веќе не е меѓу нас, не го славиме роденденот, туку го одбележуваме денот на неговото раѓање“, рече тој.

По неговото обраќање, хорот „Мирче Ацев“ ја изведе „Јано, мори“ – песна која била една од омилените на Стефановски.

Програмата продолжи со разговор на неговиот син, Игор Стефановски, со актерот и негов долгогодишен пријател Благоја Чоревски – Чоре.

Во текот на настанот хорот ја изведе и „Strawberry Fields Forever“ од „Битлси“, по што настапија младите музичари од џез формацијата „Трицикл“.

Публиката имаше можност да проследи и изведби на делови од драмските дела на Стефановски, додека хорот повторно настапи со песната „Петлите пеат“.

Во завршницата, Игор Стефановски разговараше и со новинарката Марија Зафировска, а настанот беше заокружен со музички сет на диџеј Шурбе.

Настанот, во режија на Војо Цветановски, беше замислен како отворена средба на пријатели, уметници и граѓани, со порака дека делото на Стефановски продолжува да живее во културата, во градот и во луѓето.