Поранешниот офицер на полската војска, Пјотр Павелка, на Јутјуб тврди дека украински војници кои се на обука во Полска за управување со тенкови „Леопард 2“, учествувале во несреќа во која е уништен еден ваков тенк.

Според Павелка, тенкот „Леопард МБТ“ се судрил со друг тенк, при што му е откорната куполата. Тој објави и фотографии од наводниот уништен тенк. Ниту полската, ниту украинската армија досега не го потврдиле инцидентот.

На социјалните мрежи се појавија и други верзии за инцидентот – според една, за време на обуката во Полска, тенкот наводно неуспешно се спуштил по рид, при што цевката од топот се забила во земја и ја откорнала куполата. Засега нема начин да се потврди точноста на која било од овие две верзии за случајот.

Украински војници пред неколку дена започнаа „забрзан курс“ за управување и користење на тенковите „Леопард 2“ во Полска, кој ќе трае еден месец, под раководство на инструктори на НАТО.

Полска ја испорача првата серија германски тенкови „Леопард-2А4“ во Киев на 24 февруари, а испораките од другите земји-сојузници треба да продолжат во наредните недели. Тенковите од овој модел се произведувале од 1985 до 1992 година и тие денес, во зависност од тоа колку се обновени и во каква состојба се наоѓаат, се продаваат по цени од половина милион до 4-5 милиони евра по возило.