Во тек се активностите за рачното чистење на косините на реката Вардар, како и скалите кои се обраснати со нискостеблеста вегетација, која брзо се шири на косините и скалите, информираат од ЈП „Улици и патишта“.

Досега е исчистена и помината левата и десната страна од мостот кај хотел „Холидеј ин“ се до мостот кај гостилница „Жабарот“.

Рачното косење на обраснатата вегетација, како што велат,  продолжува и на косините во насока кон општина Аеродром, односно од мостот кај „Холидеј Ин“ до мостот „Беласица“.

Изминатиот период исто така се вршеше машинско отстранување на сувите гранки на кејот на река Вардар во Централното градско подрачје, а особено во делот кај Клиничката болница”Систина”, велат од „Улици и патишта“.

Оттаму додаваат дека кејот ќе се чисти  секојдневно, со цел добивање  уреден и чист простор за погоден за рекреација на граѓаните.