Американската актерка Руни Мара (38) го очекува своето второ дете со долгогодишниот партнер, актерот Хоакин Феникс (49), пренесува „Пејџ сикс“.

Мара неодамна присуствуваше на премиерата на филмот „Кујната“ („La Cocina“) во рамки на 74. издание на Берлинскиот меѓународен филмски фестивал, познат како „Берлинале“. Актерката се појави во црн фустан на модната куќа „Живанши“, а сите погледи беа кон нејзиниот труднички стомак.

Актерската двојка го доби првото дете, синот Ривер, во 2020 година. Момчето го доби името по починатиот брат на Феникс, Ривер Феникс, кој почина од предозирање со дрога во 1993 година на 23-годишна возраст.

„Ривер им го подобри животот повеќе отколку што можеа да замислат и ги зближи. Тие се многу приватен пар и сакаат Ривер да има нормално, здраво воспитување“, рекол тогаш извор.

Двојката се запозна на снимањето на филмот „Таа“ („Her“) во 2013 година, но не започнале да се забавуваат додека не работеле заедно на друг филм – „Марија Магдалена“ („Mary Magdalene“) во 2018 година.

Иако актерот верувал дека Мара го презира, сфатил дека таа сепак е заинтересирана, но премногу срамежлива да му пријде.

„Таа е единствената девојка која некогаш сум ја барал на Интернет. Никогаш не сум пребарувал девојка на Интернет”, рекол Феникс.

Феникс ја запроси Мара во 2019 година.