Повеќедецениската традиција на собирање сликички за Светските првенства на „Панини“ ќе заврши по јубилејниот мундијал во 2030 година. ФИФА објави дека склучи ново партнерство со компанијата „Фанатикс“ која ќе ги преземе колекционерските производи од 2031 година, пренесува „Гардијан“.

Соработката меѓу ФИФА и италијанскиот бренд „Панини“ трае повеќе од 55 години, започнувајќи со првиот албум за првенството во Мексико во 1970 година, а до завршувањето на договорот во 2030 година ова партнерство ќе одбележи точно шест децении постоење.

Претседателот на ФИФА, Џани Инфантино, истакна дека новиот партнер носи иновации во начинот на кој навивачите се поврзуваат со своите омилени тимови и играчи, што ќе овозможи дополнителни приходи кои повторно ќе се инвестираат во фудбалот.

Иако партнерството се ближи кон крајот, „Панини“ останува ексклузивен партнер за Светското првенство во 2026 година, Светското првенство за жени во 2027 година, како и за финалниот заеднички турнир во 2030 година.

Во продолжение ве потсетуваме на некои од најзначајните изданија на „Панини“ кои ја одбележаа историјата на фудбалското колекционерство. Првиот албум беше објавен за Светското првенство во Мексико во 1970 година, а неговата денешна вредност меѓу колекционерите достигнува и над 10.000 фунти. Низ децениите, овие албуми станаа многу повеќе од обично хоби, прераснувајќи во вистинска глобална традиција за навивачите ширум светот.