Вкупно 80 нуркачи од Македонија, Србија, Хрватска и Босна и Херцеговина викендов се обединија со заедничка мисија за заштита на најстарото природно богатство во Европа – Охридското Езеро.

Идејата беше да се исчисти дното кај автокампот „Градиште“, а притоа да се направи побезбеден овој препознатлив локалитет, со тоа што ќе се извадат десетици предмети и шишиња, кои се испофрлани во водите.

По акцијата, нуркачкиот центар „Амфора“ го покажа „уловот“.

„Успешна еколошка акција за чистење на дното на Охридското Езеро од цврст отпад! Заедно отстранивме големо количество отпад од дното на езерото и уште еднаш покажавме дека регионалната соработка може да направи вистинска разлика за природата и идните генерации“, соопштија од „Амфора“, организатор на акцијата.