Денеска на запуштеното скопско Кале проработеа косилките и греблата, а просторот се чистеше и од ѓубре. Активностите на Калето, кое е официјално затворено за посетители цели 14 години, и за кое во изминативе години никој не се грижеше, очигледно ги размрда наближувањето на локалните избори.

Таму денеска се појави министерот за култура Зоран Љутков заедно со директорката на Управата за заштита на културно наследство, Весела Честоева, како и претседателот и претставници од ЗЕЛС, односно петте актуелни градоначалници на скопските општини од редовите на ВМРО-ДПМНЕ кои се кандидати за нов мандат, меѓу кои и кандидатот за иден градоначалник на Скопје, Орце Ѓорѓиевски.

За акцијата која се одвива во најжешкиот ден ова лето, Честоева објасни дека е дел од планот за ревитализација на Калето, но објаснување зошто оваа акција се спроведува токму денеска никој од присутните не даде.

Минатата есен министерот Љутков и директорката на Управата беа во посета на Калето и увидоа во каква ужасна состојба е, и тогаш беше најавено дека просторот ќе се отвори за посетители пролетва, но тоа не се случи. Новата најава е дека во употреба ќе биде пуштено во 2026 година.

– Двата музеи се во многу лоша ситуација, ќе треба целосно обновување на целата механизација внатре што ја има и на климатизацијата, направивме план и со ребалансот на буџетот обезбедивме 8 милиони денари коишто ќе бидат искористени до крајот на годината. Веднаш ќе пристапиме во распишување јавна набавка за поправка на овие простори, а подоцна и со реализација на целиот овој огромен проект, којшто ќе треба од 2026 година да биде пуштен во употреба. Целта е 2028 година кога Скопје ќе биде европска престолнина на културата овој простор да биде еден од најискористените – рече Љутков.

Тој се пожали дека побарал од Град Скопје и од ЈП „Паркови и зеленило“ да помогнат во чистењето, но не добил одговор, но затоа веднаш реагирале од ЗЕЛС, веројатно чувствувајќи потреба да објасни зошто на терен се присутни само градоначалниците на скопските општини од ВМРО-ДПМНЕ.

Директорката Честоева посочи дека Управата за заштита на културно наследство, која е инвеститор на музеите, ја подготвила техничката документација и во наредниов период ќе се распише тендерот за да може да се отпочне со работа.

ФОТО+ВИДЕО | Прошетка на Калето на сопствен ризик, нема кој ниту тревата да ја искоси

Ѓорѓиевски пак истакна дека преку состојбата на скопското Кале може генерално да се види и состојбата во Скопје, но и тоа како ја третираме историјата. Тој посочи дека после локалните избори Калето и сите други историски споменици во градот ќе имаат посебен третман.