Актерот, модел и музичар Итан Браун, синот на ценетиот кантавтор Џексон Браун, почина на 52-годишна возраст, а тажната вест ја потврди неговиот татко.

„Со длабока тага објавуваме дека на 25 ноември 2025 година Итан Браун, синот на Џексон Браун и Филис Мејџор, е пронајден без знаци на живот во својот дом“, се наведува во објавата на Фејсбук-страницата на неговиот татко.

„Ве молиме за приватност и почит кон семејството во овој тежок момент. Засега нема дополнителни детали.“

Татковата гордост

„Тој е многу талентиран басист“, изјави Џексон во 2022 година, зборувајќи за музичките проекти на својот син. „Уживам да го гледам и слушам неговата музика. Дали ме потсетува на мене на тие години? Не баш. Тој е подобар музичар од мене!“

 

View this post on Instagram

 

A post shared by Ethan Browne (@ezb_spinside_awr)

Семејна трагедија и татковство

Филис Мејџор, првата сопруга на Џексон Браун, починала во март 1976 година на 30-годишна возраст. Две години претходно, Итан како бебе се појавил со татко му на култната насловна страница на магазинот „Ролинг Стоун“.

Во интервју од 2021 година, Џексон Браун открил дека по смртта на сопругата грижата за синот станала негов „главен фокус“ во животот.

„Имав само две работи за кои се надевав дека ќе можам да ги спојам: да бидам кантавтор и татко“, рече тој. „И гледав на тоа вака: ако морам да бидам само татко, се надевам дека ќе знам како и дека ќе умеам да го направам тоа.“

Минатата година музичарот истакна и колку е горд што Итан и самиот станал „одличен татко“.

„Тој е прекрасен син, прекрасен човек. Сакам да го гледам со неговите деца. Кога го гледам во филмови, во манекенски кампањи, со неговата ќерка, и како е толку добар татко, тоа ме прави многу горд. Чувствувам дека направив нешто навистина исправно во својот живот.“

Џексон Браун го има и синот Рајан, кој има 43 години, со поранешната сопруга Лин Свини.