Првиот понеделник во мај повторно го обедини модниот свет на едно место – Мет гала, настан кој традиционално се одржува во Метрополитен музеј на уметноста во Њујорк. Стотици ѕвезди се искачија по скалите на музејот, претставувајќи различни интерпретации на годинашниот дрес-код „Модата е уметност“.

Гостите се движеа низ амбиент со висечки цвеќиња, зелени огради, саксии со лаванда и тепих што потсетува на мовливи камења. Дрес-кодот беше поврзан со изложбата „Костим како уметност“ на Институтот за костими, за која Мет гала претставува главен извор на средства.

Годинава беа собрани рекордни 42 милиони долари, што е повеќе од ланскиот рекорд од 31 милион, соопштија од музејот на прес-конференција пред настанот.

Меѓу сопретседавачите беа Ана Винтур, Винус Вилијамс, Никол Кидман и Бијонсе, која се врати на настанот по десетгодишна пауза. Таа се појави во светкава креација инспирирана од скелет, дизајнирана од Оливие Рустен, а со себе ја донесе и ќерката Блу Ајви, која дебитираше на Мет гала.

Тенисерката Винус Вилијамс, која е една од сопретседавачите, носеше фустан од „Сваровски“, инспириран од нејзин портрет на уметникот Роберт Пруит, изложен во Националната галерија на портрети.

Организаторите ги повикаа гостите да ја изразат својата врска со модата како телесна уметност, при што многумина се инспирираа од историјата на уметноста. Дел од изгледите беа суптилни, додека други беа понагласени и театарски.

Настанот беше проследен и со контроверзии поради главните спонзори, Џеф Безос и Лорен Санчез Безос, поради што беа најавени протести во Њујорк. Еден демонстрант се обиде да ја пробие безбедносната зона, но беше запрен од полицијата.

Лорен Санчез Безос се појави во креација на „Скјапарели“, инспирирана од сликата „Портрет на мадам Икс“ од Џон Сингер Сарџент.

Меѓу највпечатливите изгледи беа оние што си поигруваа со анатомијата и телото. Бијонсе привлече внимание со својата креација, додека Лиса носеше бел фустан со превез, дизајниран од Роберт Вун, кој вклучуваше дополнителни раце како дел од силуетата. Манекенката Хајди Клум се појави како „жива статуа“.

Бед Бани пак, беше речиси непрепознатлив, со изглед што го прикажува постар за неколку децении. Тој изјави дека секогаш се труди да направи нешто поинакво, додавајќи дека за неговиот изглед биле потребни „53 години“.