Октоври во календарот е обележан како Меѓународен месец за борбата против рак на дојка и се слави во многу земји во светот, со цел да се подигне свеста за редовни прегледи. Со рано откривање и навремено започнување со третман, ракот се лекува!

Познати ѕвезди кои излегоа од најтешката битка во животот како победници, често зборуваат на оваа тема, со цел со своето искуство да им помогнат на оние кои се соочуваат со оваа болест.

Синтија Никсон

Ѕвездата од серијата „Сексот и градот“, Синтија Никсон, во 2008 година објави дека боледува од рак на дојка, кој го победи со зрачење. Нејзината мајка се борела со оваа болест двапати, прв пат кога актерката имала само 13 години. Никсон го сподели своето тешко искуство со светот и стана амбасадорка на организацијата „Susan G. Komen for the Cure“.

Анџелина Џоли

Актерката Анџелина Џоли реши да се оперира од страв нејзините деца да не останат без мајка. Во 2013 година, таа беше подложена на двојна мастектомија по позитивен тест за геном „BRCA1“. Позитивните резултати од овој тест значат дека жената има големи шанси да добие рак на дојка.

Кети Бејтс

Откако ја победи битката со рак на јајници во 2003 година, Кети Бејтс храбро се избори со враќањето на болеста – рак на дојка во 2012 година. На 64 годишна возраст, Бејтс беше подложена на двојна мастектомија. За среќа, за овој третман не било потребна хемотерапија или зрачење.

Кајли Миног

Австралиската пејачка Кајли Миног откри дека имала рак на дојка во 2005 година, кога имала само 36 години. Нејзината отвореност и голема животна битка мотивираше многу млади жени да одат на редовни прегледи со цел навремено и успешно да се излечат доколку се детектира присуство на болеста.

Џулијана Ранчиќ

По неколку неуспешни третмани со ин-витро оплодување, водителката Џулијана Ранчиќ побарала од лекарите да направи мамограф, кој резултирал со дијагностицирање на рак на дојка. Благодарение на брзата операција, како и на големата љубов и поддршка од семејството, Џулијана ја победи оваа болест.

Анастејжа

На пејачката ѝ бил дијагностициран рак на дојка во 2003 година. За среќа, бил откриен во многу рана фаза и неговиот третман бил успешен. Познатата пејачка била подложена на двојна мастектомија откако болеста по втор пат ѝ се вратила во 2013 година.

Шерил Кроу

Пејчката го победи ракот на дојката во 2006 година, благодарение на редовен преглед на кој било забележа рана фаза на тумор. Шерил поминала со минимална операција и седум неделно зрачење. Поради нејзината болест, пејачката користела специјална диета која се состоела од риба, ореви, разнобоен зеленчук и здрави зачини.

По борбата со рак на дојка, рок ѕвездата купи фарма во близина на нејзината сестра во Нешвил и посвои две деца кои како што вели таа ѝ ја вратиле вербата во животот.