Севернокорејскиот лидер Ким Џонг Ун и неговата малолетна ќерка Ким Џу Ае посетија фабрика за производство на муниција. Таткото и ќерката направија пробни фотографии, а Ким зазеде холивудска поза како „Валканиот Хари“ во истоимениот филм со Клинт Иствуд.

На фотографиите објавени од официјалната новинска агенција на земјата (КЦНА), се гледа како Ким и неговата ќерка ги проверуваат објектите, а потоа пукаат од разни видови оружје. Според КЦНА, Ким тестирал нов пиштол кој неодамна влезе во производство, опишувајќи го како „одличен“.

Според агенцијата, Ким рекол дека „фабриката е од витално значење за снабдување на војската и безбедносните сили со пиштоли и друго лесно оружје и повикал на проширување на производствениот капацитет и инсталирање на посовремени производствени линии“.

Се чини дека девојчето е промовирано како наследничка на севернокорејскиот лидер, бидејќи често го придружува татко ѝ на разни важни настани, како што се паради, лансирања на ракети и инаугурација на клучна инфраструктура. Според разузнавачката агенција на Јужна Кореја, Ким Џонг Ун веројатно ја подготвува за свој наследник.

Во средата, севернокорејскиот лидер, повторно придружуван од малолетната ќерка, ги надгледуваше тестовите на стратешките крстосувачки ракети лансирани од разурнувачот Чое Хјон на кој се качија.

Ким Џонг Ун најави зголемување на нуклеарниот арсенал