Погрдни зборови за обвинителката Фатиме Фетаи и барања за нејзино разрешување, скандирање „УЧК“ и апел за интервенција од меѓународната заедница за, како што велат, да има правда во случајот „Монструм” во кој, според демонстрантите, се гонат невини луѓе, беше испорачано на денешниот протест во Скопје.

Протестот почна од паркот во Чаир, а пристапот до зградата на Јавното обвинителство беше блокиран од силно полициско присуство, па крајната дестинација на демонстрантите беше соседната зграда на Министерството за надворешни работи.

Протестниот марш следуваше, откако обвинителката Фатиме Фетаи, во завршните зборови во повторениот судски процес, остана на обвинението дека во случајот со петкратното убиство кај Смилковско езеро станува збор за тероризам. Ситуацијата на момент ескалира и можеше да се забележи чад, најверојатно од фрлање димни бомби во правец кон зградите на МНР. Набргу реагираа организаторите, па демонстрантите се повлекоа и протестот заврши.

Бедри Ајдари од Иницијативниот одбор на протестите изјави дека бараат само да се спроведуваат актуелните закони кои важат во нашата земја.

– Знаеме дека правниот систем во Македонија од поодамна е корумпиран и се озборува и во Европа и насекаде. Имаме забелешки и од Прибе од сите луѓе кои доаѓаат и ни кажуваат дека правниот систем не ви чини. Не дека мене не ми чини. Значи, ако јас сум само како поединец незадоволен, тоа не значи дека тоа значи нешто. Апсолутно кога некој дава забелешки, укази, прецизирања, итн. значи дека нешто не е во ред. Сите овие луѓе кои се собраа, не дојдоа затоа што јас сум со некакво име или многу познат актер или нешто друго. Сите тие луѓе веруваат дека тука треба правда и само правда за сите политички монтирани случаи, а знаеме дека не се малку, но знаеме дека не се малку и кај македонската страна и кои луѓе се таргетирани од системот. Јас реков има црна рака која оперира во сите системи, значи тоа е системот на држава кој работи под сенка, рече тој.

Ајдари истакна дека некој наредил да се убијат пет лица од македонска националност, за да ги најдат и да ги обвинуваат Албанците за, како што рече тој, да се држи некаков можеби контролиран конфликт.

– Сликата што ја покажав на г. Раде Марковиќ, истото се случи во Пеќ ми се чини во 1998 година кога тој наредил да се убијат српски деца и делото да се припише на Албанците. Ме сфаќате? – И тука некој наредил да се убијат пет македонски државјани од македонска националност за потоа да ги најдат и обвинуваат Албанците, да се држи некаков, можеби, контролиран конфликт. Значи, за да имаш повод, треба да има нешто. Не сме граѓани од пра-прадедо, тука сме од Македонија, не сме имале никогаш проблеми ни со комшии, ни со Македонци, ни со никого. Од нашите семејства не сме едуцирани да убиваме некого, а најмалку да направиме терористички чин, рече Ајдари.

Случајот во јавноста познат како „Монструм” се однесува на петкратното убиство кај Смилковското езеро на 12 април во 2012 година. На лице место беа убиени четири момчиња од македонска националност на возраст од 18 до 21 година од населбата Радишани – Филип Славковски, Александар Наќевски, Цветанчо Ацковски и Кире Трпковски и 45 годишниот Борче Стевковски од селото Црешево. Обдукцијата покажа дека во нив е пукано од три типа на огнено оружје.

Протестот е поради незадоволството на семејствата на обвинетите во овој случај, откако Обвинителството во завршните зборови на последното судско рочиште побара највисоки казни за петкратното убиство.

Во претходна постапка за случајот на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута. Врховниот суд во декември во 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм” го презеде СЈО и предметот беше вратен на повторно судење.

Случајот „Монструм” го води судијата Огнен Ставрев, а застапници на обвинението се Фатиме Фетаи и Гаврил Бубевски.Следното судско рочиште за случајот „Монструм” е закажано за 3 февруари, кога одбраната треба да изнесе завршни збоорови.