Жена од сојузната американска држава Алабама со две матки за два дена роди две здрави бебиња, по исклучително ретка бременост и вкупно 20 часа породување, пишува „Би-би-си“.

Келси Хачер (32) роди една ќерка во вторникот, а друга во средата во болницата во Алабама. Доаѓањето на своите бебиња таа го сподели со јавноста преку социјалните мрежи, заблагодарувајќи им се на неверојатните лекари.

Лекарите потврдија дека мајката и бебињата се добро и дека ова е случај кој повеќето луѓе во нивната професија ретко го доживуваат. Тие ја опишаа нејзината бременост како рутинска. А, професорот Ричард Дејвис, кој го водеше породувањето, истакна дека секое бебе уживало во „дополнителен простор за раст и развој“.

Инаку, на Келси Хачер ѝ било кажано на 17-годишна возраст дека има двојна матка  (uterus didelphys), како ретка вродена аномалија која погодува само 0,3 отсто од жените. Шансите за бременост и кај двете матки биле една во 50 милиони.

Пријавените случаи за ваква бременост во светот се исклучително ретки. Последниот познат случај се случи во Бангладеш во 2019 година, кога 20-годишната Арифа Султана роди две здрави деца со разлика од 26 дена.

Хачер изјави дека семејството се вратило дома токму на време за заедно да уживаат во божиќните и новогодишните празници.

Една во 50 милиони: Жена со две матки забременила и во двете