ФОТО | Дарио растури на славеничкиот концерт и смени пет палта: Вечерва, сите кои имате 50 години, ќе имате 35
Со енергичен концерт, скокајќи на сцената и веселејќи се заедно со публиката, Дарио го прослави својот 40-годишен јубилеј, сношти во Филхармонија.
Четири децении, тој шири радост меѓу луѓето со своите хитови, раскажува и тажни љубовни приказни, а како човек е прилично едноставен и им се радува на малите нешта. Меѓу секоја песна на концертот, имаше по една вистинска приказна.
– Вечерва ќе влеземе во една временска капсула. Оние кои имаат 50-60 години, вечерва ќе имаат 35. Оние кои имаат 40 и кусур години, ќе имаат 25. Оние кои се во триесеттите ќе имаат 18, а оние кои имаат дваесет и помалку, ќе имаат колку што имаат – порача Дарио.
Освен што беше во супер пејачка кондиција, совршено уигран со бендот и придружните вокали и непосреден со публиката, направи и сценско шоу. Од време на време, го снемуваше од сцената и се враќаше со ново палто во различна боја- смени вкупно 5.
Како за миг помина концертот, на кој умешно нѐ прошета низ баладите како „Зајди јасно сонце“, за која рече дека никогаш не ја слушнал на радио, а сите ја знаат, веселите песни како женската приказна „Немам што да облечам,“, безвренската „Мајко моја роди ме“, „Косоока“ која очекувано беше врв на концерот, но и „Ладна како камен“.
„Дупла водка“ беше навистина дупла, со неа нѐ почести два пати, на бис во една поакустична верзија- само Дарио, публиката како негов верен хор со тивка придружба од бендот. Изненадување беше песната која во 1984 година ја испеал со неговиот прв бенд „Бон тон“, „Добрите девојки“.
Своевремено, на сопругата Бојана ѝ ја посвети песната „Армија“, а таа со синот Бруно, ќерката Андреа и семејството, играа и пееја од почеток до крај, славејќи го овој триумф заедно со нивниот сопруг и татко.
„Здравје Боже, ништо друго не треба“, е уште една од едноставните, но моќни пораки на Дарио, во време кога луѓето трчаат по како што рече „пари, и уште пари“. Концертот заврши весело, со „Дајте една народна“, а публиката и пред неа, беше на нозе речиси цела вечер.
Вечерва, Дарио ќе одржи и втор концерт од 20 часот во Филхармонија, во организација на „Авалон продукција“.
