Судските власти во Казахстан изрекоа затворска казна за тројца навивачи од Белгија, откако тие се појавиле маскирани како контроверзниот филмски лик Борат за време на натпревар од Лигата на шампионите одигран во оваа средноазиска држава.

Инцидентот се случил на дуелот меѓу Кајрат и Клуб Бриж, а казахстанската телевизија емитуваше снимка на која се гледаат тројца белгиски навивачи облечени во препознатливите костими. Настанот брзо привлече внимание, но и реакција од надлежните институции.

Судот во главниот град Астана соопшти дека тројцата белгиски државјани, идентификувани само со иницијали, се осудени на по пет дена затвор поради нарушување на јавниот ред и мир.

Според судското соопштение, навивачите, под дејство на алкохол, на трибините на „Астана Арена“ ја соблекле облеката и останале само во долна облека, скандирајќи и обидувајќи се да го привлечат вниманието на присутните, со што го прекршиле законот. Тие веднаш биле извадени од публиката и приведени во полициска станица, што го потврдил и нивниот пријател Матје, кој бил сведок на случувањата.

„Сакаа само да се забавуваат, но полицијата го доживеа тоа како навреда“, изјавил тој за локалните медиуми.