Со голем транспарент „Не во наше име“, но и со пораки и извици „Живеј Палестино“ и „Санкции за Израел“, денеска граѓанската иницијатива „Сите за Палестина“ организираше протест спроти Министерството за надворешни работи (МНР).

Покрај зградата на министерството ечеа антивоени песни и беа прикажувани пораки „Крвта на невините луѓе нема да доведе до решение“, а собирот, како што рекоа од иницијативата, е во знак на солидарност со палестинскиот народ и со сите луѓе директно нападнати од Израел и САД во изминатите денови.

Истовремено, иницијативата упати пораки Македонија да предводи антивоени политики.

„Оваа недела Израел и САД убија над 100 девојчиња во училиште во Иран, изведувајќи безобразни напади додека траат ‘преговори за мир’. Во меѓувреме, го затворија преминот Рафах, преку кој се евакуираат најтешко повредените, болните и изнемоштените Палестинци, и направија стотици прекршувања на меѓународното право. Македонија има ратификувано бројни меѓународни договори и конвенции за заштита на човековите права и почитување на меѓународното право. Со поддршката на овие напади, државата ги прекршува сопствените обврски преземени пред меѓународната заедница“, рекоа од иницијативата.