Формирана е Балканска мрежа за краток филм
Во пресрет на шестото издание на фестивалот за краток филм „Дрим шорт“ од 6 до 9 август во Струга, во соработка со партнерите од регионот „Башта фест“ (Србија) и „Синема филм фестивал“ (Црна Гора), основана е „Балкан шорт филм нетворк“, мрежа за промоција на краткиот филм во регионот и едукација на млади филмски автори.
Тимот на „Дрим шорт“ за „Филмски печат“ ја нагласи целта за регионално и интернационално вмрежување со други фестивали од овој вид.
– Овие врежувања се од исклучително значење за фестивалот, бидејќи му помагаат да биде во чекор со европските филмски модерни текови и да ја оствари својата идеја да стане регионално филмско јадро. Најпрво, „Дрим шорт“ соработуваше со филмски фестивали вклучувајќи нивни гостински филмски програми, а потоа се проширивме и во едукативната сфера, соработувајќи со платформи како „Ниси маса“ за организирање на работилници за сценарио за краток филм, како и со фестивали за одржување на мастеркласови и дискусии. Годинава, се вклучивме во формирањето на Балканската филмска мрежа за краток филм заедно со „Башта фест“ и „Синема филм фестивал“, со визија за делување во креативно-едукативната сфера и промоција на кратката филмска форма – велат од тимот на „Дрим шорт“.
Прв проект на мрежата е проширувањето на едукативната програма „Башта пич“, чија цел е да собере филмски автори од Македонија, Србија и Црна Гора. Ќе бидат избрани пет проекти за краток игран филм до 30 минути.
– Избраните проекти ќе учестуваат на работилниците „Башта пич“ на „Башта фест“, „Fund Ready“ на „Дрим шорт филм фестивал“ и „Festival Ready“ на „Seanema Film Festival“. Секој проект ќе има по двајца претставници, режисер и продуцент, а во рамките на оваа програма ќе учествуваат вкупно 10 учесници. Впечатоците ќе се сумираат во октомври на веб-конференција, а проектите ќе бидат претставени пред пошироката публика. Најдобриот ќе биде награден со 1000 евра за почеток на реализација на филмот. Пријавите се отворени до 20 мај – информираат од „Дрим шорт“.
Додаваат и дека годинава на шестото издание на фестивалот ќе има богата програма.
– Освен првиот проект на Балканската филмска мрежа, најзначајни за нас годинава се уште неколку интернационални и регионални соработки, како онаа со „Сараево филм фестивал“ и соработката со „Торино шорт филм маркет“, чии детали ќе ги објавиме наскоро. „Дрим шорт“ годинава ја проширува и својата програма додавајќи VR-селекција, со тоа сме и првиот фестивал во државава што на ваков начин ќе промовира VR-доживувања како нова и модерна форма на раскажување приказна (сторителинг). Подготвуваме и многу изненадувања за музичката Оф-програма, што несомнено е автентичен белег на нашиот фестивал – изјавија од тимот.
(Текстот е објавен во ТВ и Филмски печат на 29 април 2022 во весникот „Слободен печат“)