Татјана Лазаревска и Новица Василевски по цели девет години, откако се преселија во Австралија, снимија нова песна, во Скопје. Фолк-пејачите се сега на одмор дома, во Македонија и како дует ќе настапат на претстојното издание на „Охрид фест“, на сцената на Долни Сарај, на 1 септември.

Фолк-пејачката, која неодамна со сопругот, со синовите и со мајка си беше на одмор во Грција, вели дека песната што ја снимиле со Новица е автобиографска, а се пее за нивната љубов.

– Овде во Македонија снимаме по речиси 9 години, не сме снимале практично откако заминавме. Инаку, песната е автобиографска. „Љубов ни е име, а пак среќа презиме, песна место потпис, тоа е наш краток опис“. Прекрасен текст на колегата Горан Тодоровски – ни раскажа Татјана за песната чија музика ја напиша Сехуан Секо Мемедов.

Фотографии од снимањето во студио таа објави на својот фејсбук-профил.

Во однос на тоа што е сменето на подобро, а што на полошо во Македонија, откако последен пат биле, Татјана вели:

– Ние секогаш супер си поминуваме, затоа што само дома си е дома… доста работи се смениле и на подобро и на полошо, но ние искрено не обрнуваме внимание на тоа. Нас нѐ интересира само нашата фамилија, пријателите и песната – вели Татјана.

Раскажува дека и таа и сопругот Новица имаат редовна работа од понеделник до петок во Мелбурн, а во текот на викендите настапуваат на прославите на нашинците во повеќе градови во Австралија или се релаксираат во друштво на пријатели. Работат и нивните синови, Петар и Стефан.

– Австралија е добра земја за живеење, сѐ е добро организирано и функционира. Ние си работиме од понеделник до петок, а викендите се резервирани за дружби и музика. МУ благодарам на Бога сега-засега сѐ е по таман. Јас работам како учителка во градинка, а Новица вози автобус во јавен транспорт – раскажува фолк-пејачката.

За синовите, кои како основци заминаа со родителите во нова средина, Лазаревска вели:

– Петар има 19 години, заврши средно училиште, се занимава со спорт и работи, а Стефан има 16 години, учи средно – 10-то одделение и хонорарно работи како бербер – вели Тања за синовите.

Во нивната куќа во Мелбурн често се собираат гости, а Лазаревска и Василевски сакаат да ги пречекаат сите колеги што од Македонија доаѓаат на настапи во Австралија. Друштво се собира и за нивните семејни веселби, родендени, слава и за годишнината од брак која ја прославија неодамна.

– Оваа година славевме 20 прекрасни година од брак. Само разбирање, поддршка и љубов. Тоа е формулата за успешен брак – вели Татјана.

Откако пристигнаа во Македонија, на крајот од минатиот месец, фолк-двојката имаше неколку настапи во Скопје и низ уште неколку градови, а со нетрпение го очекуваат фестивалскиот настап во Охрид.

Во Мелбурн често се дружат со Маријана Новачевска, сестрата близначка на Росана Сариќ-Тодоровска, која си замина од Скопје токму кога Новица и Татјана со синовите пристигнаа.