Претседателот на СДСМ, Венко Филипче, оцени дека актуелната власт не се справува соодветно со пожарите што ја зафатија земјата и дека наместо конкретна акција, промовира сомнителни тези за подметнување пожари, што, според него, укажува на двојна неподготвеност – и во превенција и во гаснење.

– Видовме пожари во Дојран, Крива Паланка, Чучер Сандево, каде изгореа огромни објекти. Наместо функционирање на најавените капацитети, гледаме само промоции на нова опрема која не е ставена во реална употреба – изјави Филипче на денешната прес-конференција.

Тој демантираше дека функционери на СДСМ се ситат на актуелната состојба, како што тврди владејачката ВМРО-ДПМНЕ, и најави конкретна иницијатива – сите амандмани на СДСМ за ребалансот на буџетот ќе бидат повлечени, со цел да се предложи единствен амандман за инвестирање во системот за управување со пожари.

– Ниту еден функционер од СДСМ не се сител на криза. Имаме сериозна и издржана критика, но и план за заедничка акција. За жал, такво нешто не видовме кога ВМРО-ДПМНЕ беше во опозиција – рече Филипче.

Тој додаде дека лани, во мандатот на ВМРО-ДПМНЕ, изгорела поголема површина шума отколку во последните десет години заедно, што според него е јасен показател за неспособност.

– Ќе видиме дали ќе прифатат нешто од нашите предлози. Ние сме конструктивни, предлагаме вложувања во ЦУК и ДЗС. Наместо обвинувања, време е да се преземат конкретни мерки – изјави лидерот на СДСМ.