Фејсбук привремено ја ублажи својата политика кога станува збор за статуси што се однесуваат на руската инвазија врз Украина, но само кога станува збор за случаи на воопштен говор на насилство, за изрази како „смрт за руските напаѓачи”, не и за искажување закани против цивили, пишува Ројтерс.

Таквата одлука на технолошкиот гигант веднаш предизвика поделени и спротивставени реакции кај јавноста, но гигантот на социјалните мрежи застана во одбрана на својата промена.

„Како одговор на руската инвазија врз Украина привремено дозволивме форми на политичко изразување што вообичаено би биле оценети како спротивни на нашите правила за говор на насилство”, се вели во соопштението на „Мета”, додавајќи дека се уште нема да дозволат „повици за насилство врз руски цивили”.

Објавата на „Мета” следува откако медиумите објавија дека заострената политика на Фејсбук по однос воениот конфликт покрај Русија ги опфатила уште и Ерменија, Азербејџан, Естонија, Грузија, Унгарија, Летонија, Литванија, Полска, Романија, Словачка и Украина, повикувајќи се на имејл испратен од компанијата до нејзините модератори на содржините што се објавуваат на социјалната мрежа. Од „Мета” не било одговорено за тоа кои се географските одредници на односната политика.