Федерер не дозволи изненадување, Зверев го преживеа Фриц
Осумкратниот шампион на Вимблдон, Рожер Федерер се пласираше во осминафиналето на најпрестижниот грен слем турнир откако во четири сета го совлада британскиот тенисе Камерон Нори со 6:4,6:4,5:7,6:4.
Швајцарецот во осминафиналето ќе игра против Италијанецот Лоренцо Сонего кој претходно во три сета го елиминира Дакворт.
Првите два сета беа речиси идентични, на Федерер му беше доволен само по еден брејк за до поведе со 2:0. Но, Нори не се предаваше, носен од публиката која сакаше овој меч да се продолжи успеа да дојде до брејк со кој го освои сетот (7:5) и да намали на 2:1.
Во четвртиот сет Федерер прв направи брејк за 3:2, Нори експресно возврати, но пресуден беше деветтиот гем. Во него Нори направи неколку грешки кои ги искористи Швајцарецот повторно да направи брејк и со сигурен сервис да дојде и до триумф.
Пласман во осминафиналето обезбеди и Александар Зверев кој иако го загуби првиот сет, успеа да слави над Тејлор Фриц од САД. Зверев победи во четири сета и тоа со 6:7,6:4,6:3,7:6 и си закажа осминафинална пресметка со Феликс Оже-Алиасим кој не го доигра својот меч со Ник Кирјос бидејќи австралискиот тенисер при 1:1 во сетови се предаде поради повреда.