Петнаесет возила со македонски и странски регистарски ознаки вчера биле исклучени на булеварот „Маршал Тито” во Тетово, бидејќи вршеле подготовки за организирање диви трки на автопатот Тетово-Скопје и обратно, информира Министерството за внатрешни работи.

Полицијата им изрекла соодветни казни на „дивите тркачи“, кои се честа појава во Тетово и тетовско, особено во летните месеци, кога во градот доаѓаат многу негови жители на привремена или постојана работа во странство.

„Секторот за внатрешни работи Тетово апелира до возачите да ги почитуваат законските правила и прописи во сообраќајот, навремено да ја проверуваат техничката исправност на возилата, да не организираат трки на автопатот и да придонесат за нивната безбедност и безбедноста на другите учесници во сообраќајот“, пишува во полициското соопштение.

Во спротивно, согласно Законот за безбедност на сообраќајот на патиштата, ќе им бидат конфискувани нивните возила во рок од 90 дена, додаваат од СВР Тетово.