Предлог-буџетот за 2026 година проектира раст на БДП за 2026 година од 3,8 проценти и раст на трошоците за живот од 2,5 проценти и овие стапки, според Институтот за економски политики и развој „Фајненс тинк“, се разумен одраз на моменталните економски движења и претставуваат солидна основа за проектирање на Буџетот.

– Проекцијата за инфлацијата е во линија со рестриктивната монетарна политика и искажаните заложби и намери за поддршка од фискалната страна. Сепак, „лепливоста“ на инфлацијата може да го загрози остварувањето на оваа цел, а таа главно произлегува од проинфлаторното дејство на фискалната политика преку политиките на плати и пензии, кои го зголемуваат номиналниот доход на населението. Раст на платите и пензиите кој не е сообразен со растот на додадената вредност во економијата ќе ја остави стапката на инфлација на повисоко и упорно ниво во однос на посакуваното – велат од Институтот.

Во однос на зголемување на приходната страна од 3,5 проценти во предлогот за 2026 година, „Фајненс тинк“ изразува сомнеж.

– Проекцијата за раст на вкупните приходи се заснова на проектираните приходи за 2025 година со Ребалансот на Буџетот, за кои е малку веројатно дека ќе се остварат – забележува „Фајненс тинк“.

Оттаму потенцираат дека за првпат Предлог-буџетот за 2026 прави намалување на годишната проекција за капиталните расходи за 15,1% во однос на проекцијата од минатата година, со што се напушта флоскулата „рекордни капитални расходи“, а кои никогаш не се реализираат во тој предвиден обем.

– Нема никаква општествена корист јавниот дискурс да се интоксинира со наводно рекорден износ на капитални расходи, кои потоа се кратат и не се реализираат во целост ниту сметано според скратениот износ – велат оттаму.

Со овие проекции, буџетскиот дефицит е проектиран на ниво од 3,5 проценти од проектираниот бруто-домашен производ, што е оценето од „Фајненс тинк“ како добар знак за фискална консолидација, иако останува над фискалното правило од 3 проценти предвидено во Законот за буџети.

Предлог-буџетот за 2026 година само делумно и декларативно го адресира прашањето на сивата економија, без системска стратегија за нејзино намалување, или без јасно поврзување со Стратегијата за формализација на сивата економија што е на сила, оценува „Фајненс тинк“.

– Генерално гледано, овој Предлог-буџет прави благо, но значајно структурно поместување, во позитивна насока, во однос на сите буџети од претходната деценија и повеќе. Релативно пореалното проектирање на буџетските приходи, дефицитот и капиталните расходи му даваат на Предлог-буџетот 2026 робусна и рационална компонента – заклучува „Фајненс тинк“.