Претседателката на Европската комисија, Урсула фон дер Лајен, денеска објави дека Европската Унија ќе отвори две „фабрики за вештачка интелигенција“ (центри за развој на вештачка интелигенција) во Западен Балкан. Едната ќе биде лоцирана во Србија, а другата во Македонија, како дел од поширока иницијатива за вклучување на регионот во технолошкиот развој на Европа, објави Данас.рс.

„Ова ќе им овозможи на компаниите во сите шест земји од Западен Балкан да се поврзат со овие фабрики. Ова значи дека вашите компании ќе можат да пристапат до европската инфраструктура за вештачка интелигенција токму тука во регионот. Со други зборови, компјутерската моќ на Унијата ќе биде на ваша услуга. Сакам иднината на вештачката интелигенција да се создаде во Европа. И сакам Западен Балкан да биде составен дел од неа“, изјави таа денеска во Тирана.

Фон дер Лајен потсети дека пред десет години, Европа заостануваше во глобалната трка за компјутерска моќ, со само еден суперкомпјутер меѓу десетте најдобри во светот. Денес, благодарение на стратешките инвестиции, Европа има четири вакви суперкомпјутери на врвот на светската листа, кои се користат за развој на европски решенија во областа на вештачката интелигенција.

ЕУ воспоставува мрежа од „фабрики за вештачка интелигенција“ низ целиот континент – иновативни центри каде што компаниите и стартапите можат да развиваат, обучуваат и применуваат модели на вештачка интелигенција од новата генерација.

„Ќе отвориме фабрики за вештачка интелигенција и за Западен Балкан. Ќе започнеме со две „антени“ – во Северна Македонија и Србија“, рече фон дер Лајен на првиот Инвестициски форум ЕУ-Западен Балкан.

Таа, исто така, најави дека целиот регион ќе биде покриен со нова брза дигитална инфраструктура, што ќе им овозможи на компаниите од сите шест земји од Западен Балкан директно да се поврзат со европските центри за вештачка интелигенција.

„Ова значи дека вашите компании ќе можат да ја користат инфраструктурата на ЕУ за вештачка интелигенција тука, во нивниот регион. Со други зборови, компјутерската моќ на Европската Унија ќе ви биде на располагање“, рече претседателката на ЕК.

Таа најави дека денеска во Тирана ќе бидат потпишани 10 важни деловни договори, а утре ќе бидат разгледани уште 24 потенцијални инвестиции.

„Заедно, тие би можеле да донесат повеќе од четири милијарди евра нови инвестиции во регионот. Ова ќе биде огромен поттик за целиот регион. Локалните компании ќе се прошират благодарение на европските инвестиции. А компаниите од нашата Унија ќе ги прошират своите операции во регионот, создавајќи локални работни места и нови можности во многу вредносни синџири“, рече фон дер Лајен.