Лионел Скалони не можеше да ги сокрие емоциите по драматичната победа на Аргентина над Англија (2-1), со која актуелниот светски шампион обезбеди ново финале на Светското првенство. Аргентинскиот селектор им оддаде огромно признание на своите фудбалери, и истакна дека нивниот успех се темели на заедништвото, пожртвуваноста и борбениот дух, а не на ароганцијата.

Аргентина до победата стигна по пресврт, а Скалони призна дека останал без зборови по уште едно историско достигнување на својата репрезентација.

„Искрено, останав без зборови. Ова е огромна радост за нашата земја и нашиот народ. Уште поголема радост за оваа група играчи, која никогаш не престанува да ме изненадува и која едноставно не знае што значи да се предаде“, изјави Скалони.

Емоциите целосно го совладаа аргентинскиот стратег, кој истакна дека оваа генерација постојано покажува карактер кога е најтешко.

„Гласот ми се крши бидејќи ова е доказ за толку многу работи – тимски дух, братство, никогаш да не се откажуваш и борба до самиот крај. Овие момци длабоко ме трогнаа. Немам што повеќе да кажам, сè е благодарение на нив“, додаде селекторот.

Иако мислите веќе се насочени кон големото финале против Шпанија, Скалони нагласи дека најважно е неговите играчи повторно да го дадат максимумот.

„Ќе се обидеме да победиме и ќе го оставиме срцето на теренот. Она што овие момци го прават е тешко да се опише. Луѓето тешко можат да сфатат колку многу тие даваат за репрезентацијата. Ние сме единствени. Тоа не е ароганција, туку срце. Сè доаѓа од срцето“, порача тој.

Скалони смета дека оваа аргентинска репрезентација испишува нови страници во историјата на националниот тим и дека настапот против Англија бил еден од најдобрите што некогаш ги одиграле.

„Мислевме дека натпреварот против Египет беше нашиот најдобар, но ова беше уште подобро. Без разлика кој е противникот, сепак станува збор за полуфинале. Вториот гол на Диего Марадона против Англија засекогаш ќе остане во историјата, но ако зборуваме за тимската игра што ја прикажавме денес, таа беше неверојатна.“

Аргентинскиот селектор не ги заборави ниту навивачите, кои во голем број ја бодреа репрезентацијата од трибините.

„Денес толку многу луѓе дојдоа да нè поддржат и поради тоа сум им бескрајно благодарен. Тие ни помогнаа да стигнеме до победата. Овој дрес заслужува да дадеме апсолутно сè од себе до последниот момент, без да зачуваме ниту трошка сила“, истакна Скалони.

Аргентина сега ќе има можност да ја одбрани светската титула, а во големото финале ќе се соочи со Шпанија во натпревар што ќе го даде новиот светски шампион.

Ученикот против учителот — двајца големи пријатели во финалето на Мундијалот