Емотивна приказна од минатото раскажа поп-ѕвездата Елена Ристеска на социјалните мрежи.

Таа сподели спомен од еден од најзначајните настапи во нејзината кариера, заедничкото појавување на сцената со доајенот на македонската народна песна, Вања Лазарова.

Настапот, кој се одржа во Античкиот театар во Охрид во јуни 2011 година, останува врежан како моќен спој на традицијата и модерната поп-музика. Но, она што дополнително ја прави оваа соработка посебна е еден помалку познат биографски детал кој ги поврзува двете пејачки.

Покрај заедничката љубов кон музиката и македонскиот мелос, важно е и дека Елена и Вања се родени на ист датум, 27 април. Оваа коинциденција само ја потврдува нивната судбинска поврзаност и меѓусебната почит што ја негуваа низ годините.

„Вечна ти слава, Вања“, стои во емотивната порака на инстаграм-профилот „risteskalegacy“, која Елена ја сподели со своите следбеници.

Вања Лазарова, која почина на 12 март 2017 година, остави неизбришлива трага во македонската музичка историја, а ваквите спомени се потврда дека нејзиното наследство продолжува да живее преку помладите генерации македонски музичари.