Италијанскиот теквондо тим освои три медали на Европскиот младински олимписки фестивал „Скопје 2025“, а претседателот на Италијанската теквондо федерација, Анџело Чито, жестоко го нападна организаторот во Македонија. Ова го јавува информативната агенција АНСА. Организатор е Македонскиот олимписки комитет.

– Овојпат, теквондистите заслужуваат уште поголема почит. Покрај резултатот, за пожртвуваноста што ја демонстрираа во ситуација во која никогаш не помислив дека ќе се соочам. Теквондистите беа одлични, особено во натпреварувањето во услови кои беа, благо речено, срамни од организациска гледна точка. Како сето ова можеше да се случи во денешно време е необјасниво – жестоко реагира Чито.

Потоа тој продолжува уште пожестоко.

– Распаднати објекти, прекинати мечеви, санитарни услови на границата на подносливоста. На пример, со температури од речиси 50 степени, снема струја и беше невозможно повторно да се вклучи климатизацијата. Верувајте ми, никогаш не помислив дека ќе имам вакво искуство во 2025 година. А за момчињата, натпреварувањето во такви услови беше поместување на границите – вели Италијанецот.

Потоа Чито заклучи:

– Секако, не само за нашите спортисти, туку за сите спортисти, можам само да им честитам за нивниот професионализам и посветеност. Се надевам дека оние што се одговорни ќе си ја завршат работата следниот пат, ќе следат и ќе спречат слични ситуации да се случат повторно – вели Чито.

Ова е уште еден од многуте скандали што го одбележаа ЕМОФ „Скопје 2025“, манифестација која завршува денеска, а во која учествуваа 50 земји со 4.000 спортисти.