Македонската фудбалска А репрезентација ги продолжува подготовките за контролните натпревари против Босна и Херцеговина во Сараево и Турција во Истанбул. Елиф Елмас вели дека новиот циклус, промените во тимот и новиот селектор бараат целосен фокус на сопствената игра и создавање на препознатлив стил на теренот.

– Имаме нов селектор, ова е втор собир и има нови играчи. Најважно е да бидеме фокусирани на нас и на тоа што треба да го изградиме како репрезентација пред септемвриските натпревари. Нè очекуваат силни противници и мора максимално да се подготвиме – изјави Елмас.

Нашиот репрезентативец смета дека тимот треба да игра поотворено и поофанзивно, но и да ја задржи компактноста кога е потребно.

– Очекувам да играме понапаѓачки, затоа што ако не напаѓаш, не можеш да победиш. Фудбалот бара баланс, некогаш треба сите да се браниме, а некогаш сите да нападнеме. Ќе биде важно како ќе ги спроведеме задачите што ќе ги добиеме од селекторот – рече Елмас.

Елмас се осврна и на отсуството на капитенот Енис Барди, посочувајќи дека неговото присуство секогаш има големо значење за тимот. Додаде и дека овие натпревари со Босанците и Турците ќе бидат добра можност за новите фудбалери да се вклопат во репрезентацијата.

– Енис е многу важен за нас, како капитен и како човек во соблекувалната. Ќе недостасува на овие натпревари, затоа што и кога не игра, многу им помага на сите. Секогаш позитивно ги пречекуваме новите играчи, без разлика од каде доаѓаат. Кога се игра за Македонија, сите го даваат максимумот. Наша задача е да им помогнеме побрзо да се вклопат и да создадеме добра атмосфера како што беше и претходно – се зборовите на Елмас.