Како што пренесуваат босанските медиуми, изненадувачка одлука на нашиот лев бек, Јани Урдинов пред почетокот на оваа сезона потпиша за Вележ, но во мостарскиот клуб не се задржа долго.

Урдинов минатото лето потпиша договор на една година, но после само шест месеци одлучи да ја напушти екипата на Вележ, а оваа информација ја потврдија и од босанскиот фудбалски прволиваш.

Урдинов, кој има само 28 години, ја заврши кариерата, а во разговор за „SportSport.ba“ ја откри и причина за ваквиот потег:

– Во текот на паузата која ја имавме преку зима бев дома со мојата сопруга и децата. Кога се вратив им реков на луѓето од клубот дека нема повеќе да се занимавам со фудбалот. Сега ќе започнам сопствен бизнис, одлучив дека ми е најубаво со моето семејство. Супер ми беше во Вележ, на клубот му посакувам многу успеси – беа зборовите на Урдинов.

Во својата клупска кариера настапуваше за Рода, Работнички, Екранас, Железничар Сараево, Видзев Лоѓ, Шкендија, Фљамуртари, Височина Јихлава, Бохемијанс, Зира и Ружомберок.

Вкупно петпати го носеше дресот на најдобрата македонска фудбалска репрезентација.