Минатата година, за време на доделувањето на филмските награди Оскар, актерот Вил Смит му удри шлаканица на водителот Крис Рок затоа што се пошегува на сметка на неговата сопруга Џејда Пинкет Смит.

Бракот на холивудската двојка е на „стаклени нозе“ од 2016 година, а според Џејда, јавниот скандал на Вил го зајакнал нивниот однос.

„Таа година, за малку немаше да присуствувам на Оскарите. Но, драго ми е што присуствував. Сега тоа го нарекувам ‘света шлаканица’, затоа што следуваа многу позитивни работи. Јас долги години размислував за тоа дали да го напуштам Вил, а таа шлаканица ми беше потребна за да сфатам дека никогаш нема да го напуштам“, изјави таа за „Дејли мејл“.

Мемоарите на Џејда

Во својата книга „Вредна“ („Worthy“), Џејда зборува без влакна на јазикот. Таа го опиша својот живот – од дилање дрога во Балтимор, до бракот со Вил.

На промоцијата на книгата таа откри дека таа и актерот се разделени седум години, но дека работат на својот однос.

„Навистина напорно работевме. Едноставно, многу сме вљубени еден во друг и ќе откриеме како тоа ќе функционира за нас“, рече Џејда.

Некои луѓе на социјалните медиуми бараат од Џејда да престане да открива делови од нејзиниот приватен живот.

„Може ли луѓето да престанат да ја интервјуираат Џејда Пинкет Смит? Сериозно“, напиша еден корисник, додека друг додаде: „Ако треба лично ќе им платам на луѓето да престанат да ја интервјуираат Џејда Пинкет Смит. Се колнам во Бога дека ќе го направам тоа“.

Во брак се 26 години

Актерите се запознале во 1994 година, кога Џејда учествувала на аудиција за ситкомот на Вил – „Принцот од Бел Ер“ („The Fresh Prince of Bel-Air“), а три години подоцна се венчале.

Заедно ги имаат децата Џејден (25) и Вилоу (23), додека Вил го има и синот Треј (31) со поранешната сопруга Шери Зампино.

Инаку, Џејда со години се бори со опаѓањето на косата предизвикано од алопеција. Имено, алопеција се развива кога имунолошкиот систем ги напаѓа фоликулите на косата, што резултира со губење на косата. Може да дојде до ненадејно губење на косата на темето, а во некои случаи и на веѓите, трепките и лицето, како и на други делови од телото. Исто така, може да се развива бавно и да се повтори по неколку години.