Вработените во министерствата, судовите, државните управи, агенции в четврток и петок ќе протестираат со двочасовен прекин на работата од 10 до 12 часот во знак на револт поради неусогласувањето на платите со минималната. Од синдикатот велат дека 95% од институциите не исплатиле зголемена минимална плата, а 5% исплатиле со грешки. Бараат исплата на минимална плата од 18 илјади денари, како и усогласување со минималецот за останатите вработени, односно повисоки плати за 2.806 денари.

„До сега, над 95% од институциите продолжуваат со исплата на плата под минимална плата. Останати 5% дел не знаат што да прават па не ни ја спремаат платата, а оние што се потрудиле да исплатат минимална, направиле катастрофални грешки во исплатата,“ изјави Трпе Деаноски, претседател на УПОЗ .

Од УПОЗ сметаат дека само вработените во правосудството и управите земаат плата под минималната, па затоа и револтот таму дополнително расте. Доколку нивните барања не наидат на слух кај надлежните, тие најавија радикализација на протестите. Деаноски вели дека е неразбирливо како државата не ги почитува законите кои самата ги носи.