Во Северна Кореа деновиве се функционира нормално без било какви знаци на абнормалност, соопшти јужнокорејското Министерство за обединување, а ваквите информации доаѓаат по повод шпекулациите за здравствената состојба на севернокорејскиот лидер Ким Џонг Ун.

– Нема невообичаени знаци. Ги следиме севернокорејските медиуми и забележавме размена на честитки и официјални писма по повод неодамнешната прослава, соопштува јужнокорејското Министерство додавајќи дека забележале дека Ким во средата му се заблагодарил на сирискиот претседател Башар ал Асад за честитките по повод годишнината од раѓањето на дедото на Ким, минатата недела.

-Ваквите примери за нас се знак дека во земјата се спроведуваат вообичаените активности, се вели во соопштението на министерството.

Ким последен пат е забележан во јавност на 11. април кога претседаваше со седница на владеачката Работничка партија и кога побара да се спроведат посебни мерки во борбата против корона вирусот.