Крајбрежната служба на Грција утрово излезе со официјално соопштение за случајот со тројцата македонски државјани кои вчера исчезнаа во Егејското Море кај Халкидики, а едниот од нив подоцна беше спасен.

-Под координација на Координативниот центар за потрага и спасување на крајбрежната служба, во конкретната област започна потрага со два патролни чамци на крајбрежната служба, седум бродови што се во близина, а од воздух интервенираше еден хеликоптер на военото воздухопловство. Во потрагата учествуваа и патролни возила на крајбрежната служба, Грчкиот спасувачки тим и спасувачи волонтери, пишува во соопштението од грчката крајбрежна служба, што го пренесува МИА.

Дополнително, објаснуваат дека патролен чамец на пристанишната Капетанија Неа Мудања пронајде и спаси 25-годишно момче, еден од тројцата исчезнати, кој бил пренесен во риболовното засолниште „Неа Скиони”, од каде што бил преземен од возило на брзата помош и пренесен во Општата болница Халкидики за да му се укаже помош.

Поради законот за заштита на лични податоци, пракса во Грција е во официјалните соопштенија, на полицијата, на крајбрежната служба итн да не се објавуваат податоци (националност, иницијали и сл) за инволвираните лица.