Демократскиот претставник Адам Шиф ќе биде на чело на екипата на правници во процесот на отповикување на американскиот претседател Доналд Трамп пред американскиот Сенат, објави денес претседателката на Конгресот Ненси Пелоси.

Пелоси избра седум водечки демократи, кои сите зад себе имаат долга правна кариера. Освен Шиф, станува збор за Џери Надлер, Зои Лофгрен, Хаким Џефрис, Вал Демингс, Џејсон Кроу и Силвија Гарсија.

Шиф, кој е поранешен сојузен обвинител на сојузната американска држава Калифорнија, ја водеше прелиминарната истрага во Претставничкиот дом, кој е под контрола на демократите, која во декември ги потврди обвиненијата против претседателот за злоупотреба на своите овластувања и опструкција на работата на Конгресот.

За потсетување, Трамп е обвинет дека ги користел своите функции за вршење на притисок врз Украина за Киев да го истражи демократот Џо Бајден, потенцијалниот противник на Трамп на престојните претседателски избори во ноември.

Пелоси бараше сведоците и документацијата да бидат достапни на судењето во Сенатот, откако администрацијата на Трамп ги блокираше од истрагата за отповикување во Претставничкиот дом.