Изложбата „Урбани трансформации“ на Благојче Наумоски од 22 мај (четврток), во 19 часот, ќе биде отворена во Културно-информативниот центар во Скопје. Проектот „Урбани трансформации“ се фокусира на деконструкција на елементи од урбаните структури, каде што преку акрилната техника на платно се издвојуваат и интерпретираат геометриските форми и волумените што го дефинираат брутализмот.

– Моите дела го истражуваат архитектонскиот јазик на брутализмот преку апстрактна трансформација на просторот, материјалноста и волуменот. Со ова, се стремам да создадам визуелен јазик кој го доловува суровиот карактер на бруталистичката архитектура, притоа истакнувајќи ја моќта на геометријата и минимализмот во контекст на урбаните пејзажи.

Брутализмот претставува естетика која е и ригидна и динамична, парадокс на монументалното и човечкото. Тој со своите моќни, монолитни и често минималистички форми, нуди богат визуелен јазик за интерпретација, преку кој со своите необработени конкретни форми, неукрасена функционалност и импозантно присуство, долго време ја плени мојата имагинација.

Преку процесот на деконструкција на архитектонските елементи, ги изолирам основните геометриски форми – прави линии, агли, масивни волумени – кои потоа ги трансформирам во апстрактни композиции. Овие композиции не се директни репрезентации на згради, туку ја истражуваат материјалноста, просторот и волуменот во една нова визуелна димензија – објаснува авторот на изложбата.

Осврт кон циклусот „Урбани трансформации“ на Благојче Наумоски напиша проф. д-р Гордана Вренцоска, која посочува дека циклусот еклатантно ја потврдува способноста на еден уметник да ги реинтерпретира нештата што го опкружуваат преку единствена и кохерентна уметничка визија.

– Наумоски не го критикува брутализмот како правец, туку потсетува на негрижата на општеството и запоставувањето на овие градби во денешницата. Напротив, тој го слави и оживува ова урбано културно наследство, давајќи му можност за нова уметничка еволуција и егзистенција. Смелите колористички концепти и динамичните композиции на неговите дела содржат во себе призвук од минатото, трендовска актуелност на денешницата и антиципација на иднината: нѐ носат наназад до асамблажите од циклусот „Полски села“ на американскиот уметник Френк Стела, кој со иста обоена жар и апстрактен геометризам ги „оживуваше“ естетските и архитектонските елементи на уништените села и еврејски синагоги во Втората светска војна; нѐ освежуваат како бизарните графички композиции на популарната млада уметница и графичка дизајнерка во подем Лета Собиерајски; и суптилно нѐ предупредуваат на можната дистописка иднина во налетот на урбаната деструкција и „лудилото“ во име на „прогресот“ – напиша проф. д-р Гордана Вренцоска.