Дебитантскиот игран филм на Косара Митиќ доби награда за постпродукциски услуги на филмскиот фестивал во Сараево
Дебитантскиот игран филм „17“ во режија на Косара Митиќ, како проект за игран филм на „Црна Мачка Продукција“, учествуваше на „CineLink Work in Progress“, во рамки на Денови на индустријата на 31. Сараевски филмски фестивал.
Препорачано
Успешното учество на проектот го потврди освојувањето на наградата „Аванпост Медиа“ за постпродукциски услуги во вредност од 30.000 евра.
Ова претставува прво официјално појавување на проектот пред меѓународната професионална јавност, а освоената награда е уште една потврда за неговиот висок потенцијал.
Истовремено, ова е и доказ за визионерската проценка на продукциската куќа зад проектот и значаен чекор кон исполнување на заедничката мисија – создавање филмски дела на нови авторски гласови со впечатлив и оригинален пристап.
Наградата ја додели „Аванпост Медиа“, студио со седиште во Букурешт, признато како лидер во Романија и Источна Европа во областа на продукциските и постпродукциските услуги.
Проектот „17“ е копродукција меѓу „Црна Мачка Продукција“ (Северна Македонија), „Art&Popcorn“ (Србија) и „Децембер“ (Словенија), создаден со поддршка на SEE Cinema Network, Агенцијата за филм на Северна Македонија, Филмскиот центар на Србија и Словенечкиот филмски центар со „Виба филм“ Љубљана. Премиерата на филмот е планирана за следната година.
