Во Културно-информативниот центар (КИЦ) во Скопје на 6 декември (среда), со почеток во 12 часот, ќе се одржи дебата со тематски наслов „Книжевната сцена во современиот културен контекст“.

Модераторка на дебатата ќе биде новинарката и културна истражувачка Ана Јовковска, а учесници ќе бидат писателот Петар Андоновски, писателот и книжевен преведувач Живко Грозданоски, писателката, уредничка во „ПНВ Публикации“, директорка на „Скопскиот поетски фестивал“ и програмска директорка на „Поетска ноќ во Велестово“ Јулијана Величковска и писателот и уредник во издавачката куќа „Готен“ Владимир Јанковски.

Дебатата во организација на Ана Јовковска во рамки на програмата за литературна дејност „Македонски книжевни текови“ на КИЦ-Скопје сo цел развој и афирмација на литературата и издавачката дејност кај нас.

Настанот е замислен како еден вид платформа за креативен дијалог и критичко размислување со современи македонски автори кои имаат значајна улога во креирањето на моменталните книжевни текови, културни теории и политички светогледи.

На дебатата преку делата на авторите, всушност, ќе се адресираат важни општествени прашања: современите предизвици на книжевноста, културната продукција, уметноста, културните идентитети, медиумската култура и друго.

(Текстот е објавен во „Културен печат“ број 207, во печатеното издание на весникот „Слободен печат“ на 2-3.12.2023)