Селекторот на Луис де ла Фуенте го објави поширокиот список на репрезентативци на Шпанија за следните контролни натпревари против Србија и Египет, кои ќе послужат како важна проверка пред големите предизвици што следуваат.

На списокот се најдоа 27 имиња, меѓу кои и четворица голмани. Она што веднаш паѓа в очи е застапеноста на двата најголеми шпански клуба, Реал Мадрид и Барселона. Од редовите на „кралевите“ повикан е само Хујсен, додека каталонскиот гигант има дури седум свои претставници.

Меѓу нив се Жоан Гарсија, Кубарси, Педри, Олмо, Фермин Лопез, Ламин Јамал и Феран Торес. Особено внимание привлекува повикот за Гарсија, кој за првпат добива шанса во сениорската селекција, но останува неизвесно дали ќе добие минутажа покрај стандардниот Унаи Симон, кој има и капитенска улога во тимот.

Овие натпревари ќе бидат последен филтер пред финалната одлука за составот што ќе настапи на Светското првенство. Токму затоа, не е исклучено најголемиот дел од повиканите фудбалери да се најдат и на конечниот список за мундијалот на американско тло.