Дарел Шитс, ѕвездата на популарното американско шоу „Војна на магацините“, почина на 68-годишна возраст. Шитс бил пронајден мртов во среда, 22 април, според полициското соопштение. Неговото тело било откриено во неговиот дом во Лејк Хавасу Сити, Аризона, пишува „Пипл“.

Полициската управа на Лејк Хавасу Сити објави дека нејзините полицајци реагирале на местото на настанот околу 2:00 часот наутро по „пријава за починато лице“. „По пристигнувањето, полицајците пронашле маж со очигледна самонанесена прострелна рана во главата“, се вели во соопштението. Тој бил прогласен за мртов на местото на настанот и Одделот за кривични истраги ја презела истрагата.

Телото било предадено во Канцеларијата на судскиот испитувач на округот Мохаве за понатамошна истрага, а семејството на Дарел Шитс било известено за смртта.

Властите изјавија дека истрагата е во тек и ги повикаа сите со корисни информации да контактираат со полицијата.

Шитс се здоби со слава во емисијата „Војни на магацините“, која ги следи професионалните купувачи кои лицитираат за содржината на напуштените магацини. Во Калифорнија, каде што е снимана емисијата, законот дозволува содржината на магацин да се продаде на аукција ако киријата не е платена три месеци.

Шитс го доби прекарот „Коцкарот“ во емисијата поради неговите смели стратегии за лицитирање. Тој често се појавуваше во емисијата со својот син Брендон, а во текот на својата кариера направи неколку спектакуларни откритија, вклучувајќи четири слики од Пикасо и најпрофитабилната колекција стрипови во светот.

Шитс се бореше со здравствени проблеми во последните години. Во 2019 година, тој објави на Инстаграм дека е хоспитализиран по благ срцев удар.

Се пензионираше од „Војни на магацините“ во 2023 година и отвори продавница за антиквитети во Аризона наречена „Havasu Show Me Your Junk“.